سياسة الخصوصية

مين إحنا وإيه اللي بنعمله

بناء منصة بتسمح للتاجر إنه يعمل متجر إلكتروني ويبيع منه. فيه نوعين من الناس بيوصلوا لبياناتهم عندنا، ومعاملتهم مختلفة:

• التاجر — اللي بيفتح حساب عندنا ويعمل متجر. البيانات دي بنتحكم فيها إحنا.
• الزبون — اللي بيشتري من متجر تاجر. البيانات دي بتاعة التاجر، وإحنا بنخزّنها ونعالجها نيابة عنه.

بيانات التاجر

لما تفتح حساب بنجمع اسمك، إيميلك، ورقم تليفونك لو كتبته. ولو دخلت بجوجل، بنستقبل من جوجل اسمك وإيميلك ومعرّف حسابك — وبس. مش بنطلب ولا بنستقبل الباسورد بتاع جوجل ولا صلاحية نقرا أي حاجة من حسابك.

الباسورد بتاعنا بيتخزّن مُشفّر بطريقة مش بترجّع الأصل (argon2). محدش عندنا يقدر يقراه، وده مقصود: يعني لو نسيته، بنبعتلك لينك تعمل واحد جديد، مش بنقدر نقولك القديم.

بنستخدم البيانات دي عشان ندخّلك على حسابك، نبعتلك إشعارات عن متجرك وطلباتك، ونرد عليك لو سألت.

بيانات الزبون

لما حد يشتري من متجر على بناء، بنخزّن اسمه ورقم تليفونه وعنوانه والمحافظة — وإيميله لو كتبه. ده اللازم عشان الطلب يوصل.

بنخزّن كمان السلة قبل ما تتحوّل لطلب، ومعاها البيانات اللي اتكتبت في صفحة الدفع. ده عشان التاجر يقدر يتواصل مع اللي ساب سلة من غير ما يشتري. الرقم ده بيروح للتاجر بتاع المتجر بس — مش لأي تاجر تاني، ومش لينا نستخدمه.

إحنا مش بنبيع بيانات أي حد، ولا بنستخدم بيانات زباين التجار عشان نسوّق لحاجة بتاعتنا.

الخدمات الخارجية

التاجر بيقدر يربط متجره بخدمات تانية من مركز التطبيقات. لما يعمل كده، البيانات بتروح للخدمة دي بسياستها هي مش بسياستنا. الخدمات المربوطة دلوقتي:

• جوجل أناليتكس وبيكسل ميتا وإعلانات جوجل — بيانات تصفّح وشراء، عشان التاجر يقيس إعلاناته.
• كلافيو وميل شيمب — إيميل ورقم الزبون، عشان التاجر يبعتله رسائل.
• باي موب وكاشير — لما الزبون يدفع بالكارت. رقم الكارت بيتكتب على صفحتهم هم، وعمره ما بيعدّي علينا ولا بيتخزّن عندنا.
• واتساب (ميتا) — لما التاجر يبعت تأكيد الطلب أو تحديث عليه.

الكوكيز والتخزين المحلي

بنستخدم تخزين المتصفح عشان نفتكر السلة، وإنك داخل على حسابك، واللغة اللي اخترتها. دي مش إعلانات — من غيرها الموقع نفسه مش هيشتغل.

لو التاجر ربط أناليتكس أو بيكسل، الأدوات دي بتحط كوكيز بتاعتها. الكوكيز دي بتاعتهم وبتتحكم فيها سياستهم.

مدة الاحتفاظ بالبيانات

بنحتفظ ببيانات الحساب والمتجر طول ما الحساب شغّال. الطلبات بنحتفظ بيها لأنها سجل تجاري ومحاسبي للتاجر.

لو قفلت حسابك، بنمسح المتجر وبياناته. الطلبات ممكن تفضل فترة لأسباب محاسبية وقانونية.

حقوقك

تقدر تطلب نسخة من بياناتك، أو تصحيحها، أو مسحها. ابعتلنا على الإيميل اللي تحت وهنرد.

لو إنت زبون اشتريت من متجر على بناء، الطلب ده بيروح للتاجر الأول لأن البيانات بتاعته — وإحنا بنساعده ينفّذه.

أمان البيانات

الاتصال بالمنصة كله مشفّر. الباسوردات مشفّرة بطريقة غير قابلة للعكس، وإيصالات الدفع بتتخزّن في مكان مقفول مش بيتقدّم لحد على الإنترنت.

ومع ذلك: مفيش نظام مضمون ١٠٠٪، وإحنا مش هنقولك غير كده.

التواصل

لأي سؤال عن السياسة دي أو عن بياناتك: support@benaa.store